Benvida/o ó blog do CDR " O Viso"

Benvida, benvido ó blog do Centro de Desenvolvemento Rural "O Viso".................. O que cres é o que creas.

domingo, 23 de febrero de 2025

Domingo Corredoiro: Peliqueiros


 


Un ano máis tivemos a sorte de que os peliqueiros viñeran "Á túa outra casa" a vivenda comunitaria do CDR O Viso na que conviven 12 persoas maiores. É esta unha das visitas que máis nos emocionan. E lembramos tempios pasados con eles e cóntannos o medo que lles tiñan cando eran nenas ou nenos; do que corrían para que non os pillaran porque se te pillaban debías darlle algo (aínda que só fose unha peseta) porque co que xuntaban esperaban pagar o aluguer do traxe...

Graciñas, moitísimas grazas. E que, de hoxe nun ano!  



viernes, 24 de enero de 2025

O Miguel, do Juan e a Geni, é o autor do cartel do Entroido de Xinzo 2025

 
Dende hai uns días coñecemos o cartel do Entroido de Xinzo deste ano. E levamos unha gran alegría ó sabermos da súa autoría. Por iso facemos esta entrada; queremos felicitar especialmente ó artista que o creou e á súa familia. E a todos nós.
 Miguel Carballo Álvarez é o fillo do Juan (do Clemente e a Maruja de Lodoselo) e da Geni (de Folgoso). Parabéns !!!


sábado, 23 de noviembre de 2024

Os palcos de música

Son edificacións típicas dos ámbitos rurais e urbanos que foron testemuña de miles de historias. Construcións que reflicten a maneira de ser propia e peculiar dun pobo fundamentada ó redor das festas e verbenas.

Son un símbolo da vida en comunidade e os festexos das parroquias. A súa presenza fíxose especialmente notable a partir da década de 1970 e ata os anos 2000, período no que foron construídos a maioría destes peculiares escenarios.

O patrimonio popular de Galicia inclúeos no seu catálogo de elementos arquitectónicos e tradicionais.  

Co fin de preservar e protexer tanto as historias como as estruturas destes palcos de música en Galicia, o Consello Superior de Investigacións Científicas , da man do Instituto de Ciencias do Patrimonio e co financiamento da Axencia Galega de Innovación, puxeron en marcha un proxecto de investigación bautizado como PALCOS. Cultura material e festa na paisaxe rururbana galega, cuxo obxectivo é o de mapear, catalogar e documentar os palcos de música repartidos por todo o territorio galego.

En Lodoselo temos dous no Campo da Lama e estamos a recuperalos. Levamos anos tratando de mantelos coidándoos (pequenos arranxos...) e dándolle algúns usos nas actividades do Pobo escola. Seguen a ser un punto de encontro para a infancia e a adolescencia, sobre todo pero tamén para os maiores que pasean ó redor do campo.

Este ano coa axuda que lle pedimos ó Concello o Obradoiro de emprego preparou o máis antigo e lindo, o redondo. Polo que nos din construíuse aló polo 1.958. Feito polos canteiros do pobo naqueles traballos que se facían a cambio de non ter que ir despois ó Concello (xornada de traballo cun representante de cada casa e do que quedaban liberados en compensación a ese tempo xa dedicado á comunidade). Así nos contaron que se fixera tamén co Cruceiro, o seu traslado cando se fixo a escola. Agora estamos a poñerlle a uralita no teito ó outro, máis recente, de 1.982/83 e agardamos seguir cos traballos de limpeza, lixado, imprimación e pintura. Toda a veciñanza está convidada a participar, a botar unha man. E a ver se logramos como broche final plasmar nestes espazos algúns debuxos, pinturas, murais... que realcen a súa presenza e o seu significado. 

Nesta aposta por artellar tempos e espazos (espazos dignificados) nos que as persoas nos atopemos dende o Programa de Biocoidados esta é unha actuación máis promovida e alentada dende o CDR O Viso: tecer redes de corresponsabilidade para un coidado sostible; os coidados como motor de desenvolvemento rural e comunitario. Este espazo comunitario é unha conexión cos que nos precederon e cos que nos seguirán. Coa celebración, coas festas, co sentido de pertenza a unha comunidade. Agora valoramos que tamén estes son coidados;  coidados naturais, coidados invisibles. 

Outra acción que enmarcamos no proxecto #Biocuidados: Novos modelos de coidados prestados pola comunidade, centrados na persoa, en contornas rurais; está vinculado ao Plan de Recuperación Transformación e Resiliencia do Ministerio de Dereitos Sociais, Consumo e Axenda 2030 e financiado pola Unión Europea- Next GenerationEU. Promovido pola Confederación de Centros de Desenvolvemento Rural (Coceder).



 

martes, 12 de noviembre de 2024

Magosto Lodoselo 2024

 Vídeo Magosto Lodoselo 2024

O Magosto segue a ser unha data chea de significado para nós e os nosos maiores, pois rememoran aqueles momentos nos que, nas súas casas ou no traballo do campo, se reunían arredor do lume para asar as castañas e compartir ese agasallo da natureza. Lembran como, entre traballo e tarefas diarias, o Magosto representaba un tempo de descanso e celebración, un momento de xuntanza e unión entre amigos e familia, ao redor do fumeiro e co sabor das castañas.
Hoxe os tempos cambiaron, pero a esencia do Magosto segue viva. Organizada pola Comisión de Festas que conforman os 3 magníficos (Cristina, Xoán e José Ramón)  o pobo de Lodoselo celebrou unha xornada especial. A pesares do día de chuvia sobre a marcha preparáronse tres locais a cuberto (plan B) e unha vez máis celebramos unha grande festa. 

 Unha celebración chea de calor humano e de recordos que, sen dúbida, quedará no corazón de todas e todos. Aínda que o lume xa non arde nos fogares como antes, este Magosto fixo que o espírito de xuntanza e alegría se mantivese ben vivo. É ademais unha data especialmente lembraba polos que conformamos o CDR porque seguramente aquel magosto de 1985 foi unha das primeiras actividades que organizamos cando nos conformamos xuridicamente como entidade; ver que estes días se celebra o magosto en case todas as comunidades, pobos (Nocelo, Sarreaus, Lodoselo...) é unha mostra da íntima certidume da pertenza, de formarmos parte da comunidade. Non estamos sós, sentímonos queridos, apreciados. Que contan con nós. Celebrámolo e gozámolo. 

Moitísimas gracias! Que grandes!!! A xente da vivenda, feliz co chocolate e o biscoito; quedaron tan contentos! Detallazo.


 

jueves, 15 de agosto de 2024

"O Quince": Festas 2024. Somos o que agradecemos

Un ano máis, un ano menos... Velaquí estamos nas festas do pobo. Sempre en primeiro lugar co agradecemento ás tres persoas que conformaron o equipo animador e organizativo delas; todo un exemplo do bo facer... Todo o ano preparándoas, organizando as xuntanzas veciñais para irnos informando e mesmo deliberando xuntxs... Carteis informativos, traballo nas redes, traballo...  Graciñas!

 

 Hoxe a partires das 17 h temos a festa da escuma na cortiña de abaixo, o diestro que está diante do bar. Tamén poñeremos polas rúas do pobo ó longo do Barrio dos Tres Pés e pola Canella da Ponte ata o Outeiro xogos tradicionais, populares e do mundo, aproveitando as sombras e convidando a toda a veciñanza e xente convidada a que participe. Coma sempre, aínda que haberá algunhas persoas para alentar e mesmo explicar os xogos, o convite é xogar e divertirnos xuntxs. É importante e necesario que volvamos deixar os enredos, materiais... como os atopamos para que a seguinte persoa que participe atope as fichas e todos os materiais como ti os atopaches, listos para compartir este momento. Sen a colaboración de todas e todos sabemos que isto non funciona. Graciñas.

Ó final dese circuíto de xogos teremos abertas as Casas da Memoria. Estades convidados a visitar e coñecer estes espazos que forman parte da nosa identidade. Paneis co proceso de recuperación das mesmas, coa microtoponimia (os nomes dos lugares) de Lodoselo, o tema das minas (algunhas ferramentas, código qr con acceso a Radio Lodoselo e os podcast sobre esta temática, un vídeo coa voz e imaxes dalgúns dos protagonistas...) e outras informacións referidas á historia do noso pobo de destes espazos nos que pasamos os días ( O monte do Viso, a Casa de Sorga, etc)

Sempre convidadas e convidados a que posibilitedes coa vosa presenza a que estes encontros contribúan a seguirmos testimoniando que xuntos somos mellores; que aínda que poideramos vivir sen os demais a vida gústanos máis compartindo, pasándolle o testigo ós máis novos do que foi a vida dos nosos maiores. E xa sabedes tamén... facede achegas e propostas de mellora. Xuntxs somos mellores.