Benvida/o ó blog do CDR " O Viso"

Benvida, benvido ó blog do Centro de Desenvolvemento Rural "O Viso".................. O que cres é o que creas.

lunes, 27 de junio de 2022

Colectivos de Acción Solidaria, A Memoria da Auga... Aínda é tempo de esperanza

 

https://www.kizoa.com/Movie-Maker/d385841758k1828970o2l1/CAS e Memoria da Auga (Boado)

 Na mañá do xoves 23 de xuño acollemos a visita dun pequeno grupo de representantes de  CAS, Colectivos de Acción Solidaria. A partires das 10.30 foron chegando de Salamanca - Asam, de Cantabria- a  Columbeta, de Ávila- escolas campesiñas de Ávila, de Palencia - escolas campesiñas de Palencia, e de Segovia –  Codinse.

Son do Grupo de Traballo de Maiores e están a traballar na definición do modelo de CAS para a atención ás persoas maiores, no que as persoas maiores permanecen no seu propio medio, na súa propia casa, cos seus propios veciños e veciñas con quen conformou a súa propia historia. E é sobre este modelo sobre o que este grupo centra a súa principal actividade, traballando, compartindo, defendendo e apostando porque sexa unha realidade.
Os Colectivos de Acción Solidaria,  CAS, son unha ONG que está constituída por diferentes asociacións implantadas principalmente no medio rural de diversas Comunidades Autónomas do Estado español; desde a proximidade centran a súa acción social cos sectores máis desfavorecidos.

Pasamos a xornada amosándolle a nosa actividade e dialogando sobre ela. No Centro de Inclusión Ada e Helena achegáronlle a realidade do día a día; na Casa niño a Lucía contoulles esta acción coas crianzas de 0-3 así coma o programa de educación infantil familiar na Limia. E percorremos o xardín sensorial. Despois de xantar no Centro e coñecer de primeira man o servizo da cociña, do xantar a domicilio e aquí no propio Centro estivemos na vivenda comunitaria, A túa outra casa. E xa na antiga reitoral e cando iamos dar un paseo polo pobo e as distintas estancias (fiadeiro, forno, casas da Memoria) que empregamos no Pobo escola chegou o Ramiro, o representante do CDR Ancares, que tamén forman parte de CAS. Á noitiña achegámonos a Couso e volvemos para cear e nesta xornada de chuvia e fresco encendemos a cheminea para seguir conversando ata a madrugada. Na mañá do sábado aínda tivemos tempo de visitar as estancias do Carballo con botas e dos animais, a horta e despois do almorzo ir collendo de novo o camiño de regreso. Moitísimas grazas.

Grazas tamén á Veciñanza de Boado e Portoalto que da man do Camilo Vila nos agasallaron este pasado sábado, en plenas festas do pobo, co libriño: A Memoria da Auga; historias de Boado e Portoalto. O produto da memoria colectiva dun equipo de máis de 20 persoas que na escola de Boado se xuntaron e viviron esta aventura de rebuscar e recoller a moita vida que a auga lle deu ó rural. E un acto entrañable, no cruceiro, cheos de ledicia, vendo e escoitando a crianzas e maiores cheos de ilusión e co mellor espíritu de colaboración tecendo a comunidade, lembrándonos que aínda é tempo de esperanza.

lunes, 20 de junio de 2022

Alfombras florais con motivo do Corpus




    Coa festividade do Corpus Christi, moitas localidades galegas engalanan as rúas con alfombras florais para honrar ao Santísimo Sacramento. Nalgunhas delas, a tradición está tan arraigada e as alfombras son tan espectaculares que, máis aló da súa motivación relixiosa, o Corpus ten rango de festa de interese turístico. 
Ponteareas (Pontevedra) é a máis coñecida embaixadora galega desta arte que desaparece baixo os pés dos fieis que acompañan a procesión do Santísimo Sacramento, e a súa Festa do Corpus Christi está declarada de Interese Turístico Internacional. As outras dúas con recoñecemento de festas de interese turístico, aínda que de ámbito galego, son a Festa do Corpus de Redondela (Pontevedra) e Alfombras Florais de Ares (A Coruña).
Dende hai anos aquí, na nosa comarca, tamén se ten estendido este traballo en moitas das parroquias. Este ano no noso pobo fíxose dentro da igrexa porque a chuvia e o vento non permitiron a súa execución fóra. Parabéns ás artistas!!! 
 



 

viernes, 11 de marzo de 2022

Fitotoponimia Lodoselo

Todos somos conscientes de que os nomes dos lugares no pobo,  das terras, dos regueiros, das fontes, mesmo de algún penedo... corren un grave risco de desaparecer porque a maioría só teñen existencia na memoria das persoas maiores. Quedamos case sen xente que saiba deles… hai algunha proposta interesante, mesmo na rede, como o da Galicia Nomeada que fai un chamamento a que non o perdamos.
Este é outro empeño no que andamos a vecindade de Lodoselo: un traballo de colaboración que tentariamos incorporar nas “casas da memoria”: os nomes dos lugares. Se despois atopamos quen nos faga unha explicación deles pois mellor. A continuación póñovos un material que fun elaborando como exemplo dos que eu controlo e dos que fun buscando información. Pero hai moitos máis e seguro que entre todxs o imos facer mellor. A proposta é pois seguir aumentando o listado dos nomes. Só por delimitar o territorio en dúas partes imos facer a divisoria da estrada. Así que a proposta sería ir anotando eses lugares e se se pode indicar a súa situación (polo menos da estrada para riba ou para abaixo; calquera outra indicación tamén sería benvida).  
Para a xente que teñamos tempo, ganas e poidamos aquí temos, se vos parece, un traballo de todxs e para todxs. Graciñas

 https://www.linkedin.com/posts/antonio-r-corbal-81102849_fitotoponimia-lodoselo-activity-6907996046505701376-sJ9z

lunes, 28 de febrero de 2022

Apareceu onte, domingo, unha nova variante de Covid-19 no fondo da calle, Lodoselo


O persoal do Centro de investigación FRELOPE S.L. andou este pasado domingo polas rúas do pobo e de casa en casa ofrecéndonos a participación voluntaria nun 2 en 1 ( test + vacina). Ante a nova variante "Omicroentroido" aparecida esta pasada semana nun habitante do fondo da calle, en Lodoselo, que tamén formaba parte da comitiva na compaña do seu can, o Thor.
Estes afamados investigadores tiveron a ben darnos a información que aquí relatamos acompañada das imaxes do folleto que gratuitamente repartían. Así a forma de contaxio pode ser:
1. Por ver a outras persoas positivas de omicroentroido, ver peliqueiros ou xente disfrazada.
2. Escoitar o ruxe-ruxe das chocas, charangas ou música.
3. O arrecendo de herbas fermentadas e carne rustida.
Os síntomas que presenta esta variante son:
- Formiguillo nos pés
- Tremores nas pernas
-  Malestar na casa
- Falta de sono
-En casos graves, abandono do traballo.
Os resultados do test:
Positivo: Claramente é que tés ganas de non parar na casa
Negativo: Se che molesta o ruído e non estás a gusto. Se queres seguir sendo negativo pór tapóns para os ouvidos e tapar os ollos con algo ben opaco.
Finalmente o tratamento
No caso de ser positivo recoméndase saír da casa, xuntarse con outras persoas positivas de omicroentroido e tomar Entroidocepan.
Recomendan tomar 20cc Entroidifen cada 2 horas e acompañado de cachucha, chourizos, lacón e demais produtos que son fáciles de atopar nas casas dos pobos, no rural, na casa dos avós.
É dicir, onde a xente vive para a xente.   






domingo, 20 de febrero de 2022

Peliqueiros no Domingo Corredoiro

Un ano máis os "nosos peliqueiros" visitaron aos maiores na vivenda comunitaria "A túa outra casa". Despois agardaron á xente á saída da misa e animaron as rúas non só en Lodoselo. Tamén polos pobos de  Escornabois, Sarreaus, Freixo, ... Moitísimas grazas e que de hoxe nun ano!

Pincha no enlace para facerte unha idea destes momentos que seguen a ser sempre espectaculares:


https://youtu.be/cVQrCby4U60


sábado, 19 de febrero de 2022

Parabéns a este veciño de Nocelo da Pena (Sarreaus)

Xosé Luís Otero Becerra, artista: "Esta mostra é unha viaxe á miña infancia, xa que o tempo é cíclico, sobre todo no rural"

Distopía reúne 176 obras entre esculturas, pintura, fotografía, instalacións ou gravado 

Son reflexións do que queda na paisaxe tras a desaparición do ser humano

A mostra está aberta no Centro de Arte Contemporánea Graça Morais de Bragança 

Non abondaría co noso vehículo para botarlle unha man no transporte das obras Xosé Luís Otero desde O Porriño a Bragança. Preto de 4 toneladas de peso para 176 obras que se poden ver no Centro de Arte Contemporánea  Graça Morais. Estamos ante o primeiro galego que expón nese espazo e o segundo español que o fai, co recoñecemento que isto leva implícito. 

https://www.g24.gal/-/xose-luis-otero-artista-esta-mostra-e-unha-viaxe-a-mina-infancia-xa-que-o-tempo-e-ciclico-sobre-todo-no-rural-?fbclid=IwAR3lcItaeRcMjLVYewi3-uMOfBslCbFDjcBYw7y0jy2OqZW7_O05y7vvfO0&jwsource=cl 

domingo, 13 de febrero de 2022

Entroido 2022

 
Este domingo , 13 de febreiro, apareceron estes carteis polo pobo adiante. Velaquí o texto: 
Veciños de Lodoselo. Este ano o concello de
Nocelo non nos deixa celebrar o entroido
como estamos acostumados, entonces 
celebrarémolo por barrios:
1. Barrio da Igrexa e os Tres Pes
2. O Areal e San Paio
3. Calle, Pazobello e Sorga
4. Outeiro e Ribeiriño
5. A Chave e a Cagalla
 
Importante: Non xuntarse máis de100 persoas por grupo.
E o día do carro chupitos e bica!!